Dagur Austmann Hilmarsson er genginn í raðir Þróttar Reykjavíkur frá ÍBV og gildir samningur hans við Þrótt út leiktíðina. Þetta kemur fram á heimasíðu félagsins í dag.
Dagur er 21 árs gamall varnar- og miðjumaður sem kom við sögu í 18 leikjum með Eyjamönnum í Pepsi-deildinni á síðustu leiktíð.
Dagur varð fyrir því óláni að fótbrotna í september á síðasta ári og þegar hann lék með ÍBV í sigri liðsins gegn Stjörnunni í Mjólkurbikarkeppninni í 32-liða úrslitunum um síðustu mánaðarmót var það fyrsti leikur hans í átta mánuði.