„Mér finnst þær ekki búnar að vera nægilega sannfærandi og þær hafa verið að kreista út sigra á undirbúningstímabilinu,“ sagði Harpa Þorsteinsdóttir, fyrrverandi landsliðskona, þegar rætt var um Val í upphitunarþætti Dagmála fyrir Bestu deild kvenna í knattspyrnu sem hefst á þriðjudaginn.
Þær Harpa, Bryndís Lára Hrafnkelsdóttir, fyrrverandi markvörður KA/Þórs og ÍBV meðal annars, og Helena Ólafsdóttir, umsjónarmaður Bestu markanna á Stöð 2 Sport, voru sérfræðingar þáttarins.
„Pétur þjálfari sagði nú í einhverju viðtali að hann vildi vera með 30-manna leikmannahóp, ég hugsaði strax hallelujah,“ sagði Helena.
„Hann hlýtur að hafa mjög gaman af dramasímtölum,“ bætti Harpa við.