Yfirvöld í Moskvu hafa lokað aðdáendasvæði Evrópumótsins í knattspyrnu í borginni og sett 1.000 manna takmörk á samkomur.
Fjöldi kórónuveirusmita hefur vaxið á síðustu dögum í borginni.
„Ég vildi ekki gera þetta, en við eigum ekki annarra kosta völ,“ sagði Sergei Sobyanin borgarstjóri Moskvu í yfirlýsingu. „Frá og með deginum í dag munum við takmarka samkomur við þúsund manns,“ er haft eftir Sergei í yfirlýsingunni.
„Við munum tímabundið stöðva alla stóra skemmtanaviðburði og við munum einnig þurfa að loka dansstöðum og aðdáendasvæðum,“ sagði Sergei og vísaði þar til aðdáandasvæðis Evrópumótsins fyrir utan Luzhniki-völlinn í borginni.