„Ég skil Liverpool fullkomlega“

Knattspyrnustjórinn Pep Guardiola vildi ekki gagnrýna leikmannakaup enska úrvalsdeildarfélagsins Liverpool þegar hann var spurður út í eyðslu félagsins á leikmannamarkaðnum í sumar. Liverpool hefur eytt tæplega 200 milljónum punda í nýja leikmenn í sumar en Spánverjinn segist skilja eyðslu Jürgen Klopp, knattspyrnustjóra liðsins, fullkomlega.

„Önnur félög í deildinni gera það sem þau þurfa að gera. Ég skil eyðslu Liverpool fullkomlega. Ég er ekki að hugsa um hluti sem einhverjir hafa látið út úr sér í fortíðinni. Liverpool telur sig þurfa þessa leikmenn til þess að vera samkeppnishæfir og ég dæmi þá ekki. Þetta er þeirra ákvörðun og þannig er það. Gæðin í úrvalsdeildinni eru orðin meiri en áður, við sáum til þess  á síðustu leiktíð. Önnur lið þurfa að styrkja sig ef þau vilja skáka okkur. Liverpool er sögufrægt félag sem vill vinna titla og þeir eru að reyna gera það,“ sagði Guardiola á blaðamannafundi í gær.

Liverpool og Manchester City mætast í International Champions Cup-æfingamótinu í Bandaríkjunum í nótt en bæði lið ætla sér stóra hluti í ensku úrvalsdeildinni á næstu leiktíð.

• Blogga um frétt