Gareth Southgate hefur skrifað undir nýjan samning við enska knattspyrnusambandið sem þjálfari karlalandsliðs Englands.
Southgate, sem tók við enska landsliðinu í nóvember 2016, var með samning sem átti að renna út að loknu heimsmeistaramótinu í Katar í desember 2022.
Nýi samningurinn hans gildir til ársloka 2024 og þar með er ljóst að Southgate stýrir enska liðinu í næstu Evrópukeppni en undankeppni hennar er leikin á árinu 2023 og lokakeppnin sumarið 2024.
Enska landsliðið komst í sumar í úrslitaleik Evrópumótsins þar sem það tapaði fyrir Ítalíu í vítaspyrnukeppni og náði með því sínum besta árangri í alþjóðakeppni frá því það vann heimsmeistaratitilinn árið 1966. Þá komst enska liðið undir hans stjórn í undanúrslit heimsmeistaramótsins í Rússlandi árið 2018 og fékk bronsverðlaun í Þjóðadeild UEFA.