Alonso á ráspól í Kína

Alonso heldur út í brautina í Shjanghæ í morgun.
Alonso heldur út í brautina í Shjanghæ í morgun. ap
Heimsmeistarinn Fernando Alonso hjá Renault var í þessu að vinna öruggan sigur í keppninni um ráspól kínverska kappakstursins. Liðsfélagi hans Giancarlo Fisichella hreppti annað sætið í lokin en Michael Schumacher á Ferrari varð sjötti eftir að hafa naumlega sloppið inn í lokalotu tímatökunnar.

Rubens Barrichello á Honda varð í þriðja sæti og jafnaði þar með sinn besta árangur í tímatökum í ár. Hóf hann einnig keppni af þriðja rásstað í ungverska kappakstrinum. Á morgun hefur Barrichello keppni í 230. sinn.

Liðsfélagi Barrichello, Jenson Button, varð fjórði í tímatökunum en svo óvenjulega vildi til að þeir hlutu nákvæmlega sama tíma upp á þúsundasta úr sekúndu. Barrichello var þó fyrri til og hlaut því fremra sætið.

Bílar á Michelin-dekkjum reyndust ráða mun betur við rennblautar aðstæður í Sjanghæ en bílar á Bridgestone-dekkjum. Kimi Räikkönen á McLaren varð fimmti og liðsfélagi hans Pedro de la Rosa varð að gera sér sjöunda sætið, á eftir Schumacher, að góðu eftir að hafa snarsnúið bílnum í brautinni á sínum hraðasta hring.

Schumacher var eini ökuþórinn á Bridgestone-dekkjum sem komst í hóp 10 fremstu. Var það ekki fyrr en á lokamínútu annarrar lotu tímatökunnar að hann komst í lokalotuna, skaust þá úr 15. sæti í það níunda.

Bætti Schumacher sig síðan örlítið í lokakeppninni en keppinautur hans um heimsmeistaratitilinn, Alonso, var næstum því hálfri annarri sekúndu fljótari með hringinn er hann tryggði sér sinn 15. ráspól á ferlinum.

Stöðugt rigndi er tímatakan fór fram, lofthiti 21°C en brautarhiti 22 gráður. Fyrir vikið áttu ökuþórar erfitt með að hemja bílana á brautinni og nánast allir lentu einhverju sinni út úr henni. Alonso var í sérflokki og átti besta brautartímann í öllum lotunum þremur.

Aðstæður versnuðu eftir því sem á leið tímatökuna en er lokalotan hófst hafði lofthiti lækkað í 19°C og raki mældist 90%. Hið kalda og vota veður í Sjanghæ hefur sett allar áætlanir liðanna fyrir kínverska kappaksturinn í uppnám, en þau gerðu ráð fyrir mun heitara verðri og þurrki er keppnin færi fram. Nú er spáð rigningu er kappaksturinn fer fram á morgun.

Í fyrstu lotu féllu báðir Toyota-þórarnir úr leik, Jarno Trulli og Ralf Schumacher, báðir ökuþórar Spyker-MF1, Tiago Monteiro og Christijan Albers, og báðir ökuþórar Super Aguri, Takuma Sato og Sakon Yamamoto. Undir öllum þessum bílum eru Bridgestone-dekk.

Þrír Bridgestone-búnir bílar féllu úr leik í annarri lotu, Williamsþórarnir Mark Webber og Nico Rosberg urðu í 15. og 16. sæti og Felipe Massa á Ferrari í 13. Einnig féllu þá brott Vitantonio Liuzzi á Toro Rosso, David Coulthard á Red Bull og Scott Speed á Toro Rosso.

Athygli vekur að hollenski ökuþórinn Robert Doornbos á Red Bull komst í lokaslag um 10 fremstu sætin en hann er að þreyta frumraun sína í keppni með liðinu. Var hann þriðji ökuþór liðsins þar til í síðasta móti er hann tók við af Christian Klien.

Niðurstaða tímatökunnar varð annars sem hér segir:

Tímatökurnar í Sjanghæ Lota 1 Lota 2 Lota 3
Röð Ökuþór Bíll Dekk Röð Tími Hri. Röð Tími Hri. Pos Tími Hri
1. Alonso Renault M 1. 1:44.128 5 1. 1:43.951 6 1. 1:44.360 10
2. Fisichella Renault M 2. 1:44.378 4 2. 1:44.336 6 2. 1:44.992 9
3. Barrichello Honda M 12. 1:47.072 9 6. 1:45.288 8 3. 1:45.503 9
4. Button Honda M 6. 1:45.809 9 3. 1:44.662 9 4. 1:45.503 9
5. Räikkönen McLaren M 4. 1:44.909 7 8. 1:45.622 6 5. 1:45.754 9
6. M.Schumacher Ferrari B 14. 1:47.366 6 9. 1:45.660 9 6. 1:45.775 9
7. de la Rosa McLaren M 3. 1:44.808 6 5. 1:45.095 8 7. 1:45.877 9
8. Heidfeld BMW M 10. 1:46.249 8 4. 1:45.055 9 8. 1:46.053 10
9. Kubica BMW M 8. 1:46.049 8 7. 1:45.576 9 9. 1:46.632 9
10. Doornbos Red Bull M 11. 1:46.387 7 10. 1:45.747 8 10. 1:48.021 9
11. Speed Toro Rosso M 9. 1:46.222 8 11. 1:45.851 7      
12. Coulthard Red Bull M 7. 1:45.931 8 12. 1:45.968 7      
13. Massa Ferrari B 13. 1:47.231 6 13. 1:45.970 9      
14. Liuzzi Toro Rosso M 5. 1:45.564 6 14. 1:46.172 9      
15. Webber Williams B 16. 1:48.560 9 15. 1:46.413 9      
16. Rosberg Williams B 15. 1:47.535 9 16. 1:47.419 9      
17. R.Schumacher Toyota B 17. 1:48.894 9            
18. Trulli Toyota B 18. 1:49.098 9            
19. Albers Midland B 19. 1:49.542 9            
20. Monteiro Midland B 20. 1:49.903 6            
21. Sato Super Aguri B 21. 1:50.326 6            
22. Yamamoto Super Aguri B 22. 1:55.560 7            

Felipe Massa á Ferrari færist aftast á rásmarkið og hefur keppni í 22. sæti þar sem skipt var um mótor í bílnum hans eftir æfingar í gær. Bílar í 14. til 22. sæti á tímatökulistanum færast því fram um eitt sæti hver.

Rubens Barrichello samfagnaði Alonso og Fisichella með árangurinn í tímatökunum ...
Rubens Barrichello samfagnaði Alonso og Fisichella með árangurinn í tímatökunum í Sjanghæ en sjálfur varð Hondaþórinn þriðji. ap
Schumacher átti erfitt uppdráttar í tímatökunum.
Schumacher átti erfitt uppdráttar í tímatökunum. ap
Doornbos stóð sig vel í tímatökunum í Sjanghæ.
Doornbos stóð sig vel í tímatökunum í Sjanghæ.
mbl.is

Bloggað um fréttina