Brosið eins stórt og Ísland

Kjartan Henry Finnbogason skoraði mark Horsens í 1:1-jafnteflinu gegn Lyngby í dönsku úrvalsdeildinni í fótbolta í gær. Kjartan jafnaði á 84. mínútu og hafnar Horsens í 6. sæti deildarinnar með 35 stig. 

Efstu sex lið deildarinnar keppa sín á milli um danska titilinn og sæti í Evrópukeppnum. Næst á dagskrá hjá Kjartani eru verkefni með íslenska landsliðinu í Bandaríkjunum, sem hann er ansi spenntur fyrir. Kjartan gaf sér tíma og ræddi við danska miðilinn BT áður en hann hélt vestur um haf. 

„Ég er á leið til San Francisco og New York til að spila við Mexíkó og Perú. Það er spennandi og það væri gaman að vera leikmaður Horsens og fara á HM í Rússlandi," sagði Kjartan og að sögn BT var brosið hans jafn stórt og Ísland er talið barst að HM. 

Kjartan Henry kom til Horsens árið 2014, er það lék í B-deildinni. Fjórum árum síðar, er liðið að leika sitt annað tímabil í efstu deild. 

„Þegar ég fór að sofa í gær dreymdi mig um að ég myndi gera eitthvað mikilvægt í leiknum og það var gott að skora. Ég er búinn að vera með Horsens alla leið, ég skoraði 18 mörk í 1. deildinni og skoraði mikilvægt mark á fyrsta tímabilinu í efstu deild á síðustu leiktíð. Það er gaman að spila fyrir þetta félag og þjálfarann," sagði Kjartan að lokum. Þjálfari Horsens er enginn annar en Bo Henriksen, fyrrum leikmaður Vals, Fram og ÍBV. 

• Blogga um frétt