Skjern og GOG skildu jöfn, 31:31, þegar liðin mættust í dönsku úrvalsdeildinni í handbolta í dag, en íslenskir landsliðsmenn eru í báðum liðum.
Elvar Örn Jónsson átti góðan leik hjá Skjern og skoraði sex mörk úr níu skotum. Viktor Gísli Hallgrímsson varði níu skot í markinu hjá GOG og var með 23 prósenta markvörslu.
GOG hefur farið vel af stað og voru stigin í dag þau fyrstu sem liðið tapar. Er GOG í öðru sæti með sjö stig, einu stigi frá Aalborg sem er með fullt hús stiga.
Arnór Atlason er aðstoðarþjálfari Aalborg sem er með fullt hús stiga. Skjern er í áttunda sæti með þrjú stig.