Handknattleiksmaðurinn Sveinn Jóhannsson þurfti að gangast undir aðra aðgerð á hné vegna alvarlegra meiðsla sem hann varð fyrir á æfingu með íslenska landsliðinu undir lok síðasta árs.
Í samtali við Handbolta.is kvaðst Sveinn hafa þurft að gangast undir aðra aðgerð þann 16. maí síðastliðinn þar sem ekki hafi tekist að laga allt sem þurfti í fyrri aðgerðinni í lok janúar.
Hefur hann ekkert getað æft eða spilað handbolta á árinu vegna meiðslanna.
Sveinn er bjartsýnn á að vera orðinn leikfær í ágúst eða september á þessu ári en hann skiptir um félag í sumar.
Samningur Sveins við SönderjyskE í Danmörku er að renna sitt skeið og er hann búinn að semja við Erlangen í þýsku 1. deildinni, þar sem goðsögnin Ólafur Stefánsson er aðstoðarþjálfari.