Íslenski landsliðsmaðurinn Tryggvi Snær Hlinason var maður leiksins hjá spænska liðinu Casademont Zaragoza í ótrúlegum 93:91-útisigri á New Basket Brindisi frá Ítalíu í Meistaradeild Evrópu í körfubolta í kvöld.
Ítalska liðið var yfir nánast allan leikinn en Zaragoza gafst ekki upp og skoraði að lokum sigurkörfuna þremur sekúndum fyrir leikslok.
Tryggvi var með flesta framlagspunkta allra í spænska liðinu en hann skoraði 14 stig, tók níu fráköst, varði eitt skot og stal einum bolta á aðeins tæpum 17 mínútum.
Með sigrinum tryggði Zaragoza sér toppsæti D-riðils og er liðið komið í 16-liða úrslitin.