GreenQloud og Advania í samstarf

Advania og GreenQloud hafa samið um að Advania bjóði upp á skýjalausnir GreenQloud, en það er fyrsta tölvuský heims sem er eingöngu knúið endurnýjanlegri orku. Þetta kemur fram í tilkynningu frá félaginu.

Eyjólfur Magnús Kristinsson, framkvæmdastjóri rekstrarlausna Advania, segir þessa laun sérstaklega passa nýjum fyrirtækjum. „Það er okkur sönn ánægja að vinna með vaxandi sprotafyrirtæki eins og GreenQloud en það fyrirtæki hefur vakið verðskuldaða athygli fyrir snjallar og umhverfisvænar lausnir. Við sjáum fyrir okkur að þessi lausn henti sérstaklega fyrir ný fyrirtæki í hröðum vexti,“ segir Eyjólfur.

Bala Kamallakharan, framkvæmdastjóri GreenQloud, segir þetta bæta stöðu fyrirtækisins á alþjóðlegum markaði. „Samstarfið mun styrkja stöðu GreenQloud á íslenska markaðinum, í Skandinavíu og víðar ásamt því að gera Advania kleift að bjóða upp á fjölbreyttari skýjalausnir,“ segir Bala.

• Blogga um frétt