Íslenska hugbúnaðarfyrirtækið Meniga fékk Nýsköpunarverðlaun Íslands á Nýsköpunarþingi í dag, en það var Ragnheiður Elín Árnadóttir, iðnaðar- og viðskiptaráðherra sem afhenti verðlaunin. Meniga er í dag með starfsemi í Reykjavík, London og Stokkhólmi og með 80 starfsmenn.
Þýskaland, Spánn og Suður-Afríka eru stærstu markaðir Meniga. Hugbúnaður Meniga nær til, eða mun fljótlega ná til, um fimmtán milljóna netbankanotenda í fjórtán löndum. Meniga hefur hlotið fjölmörg alþjóðleg verðlaun og viðurkenningar fyrir sinn hugbúnað á undanförnum árum og nú hefur fyrirtækinu verið veitt Nýsköpunarverðlaun Íslands.
Nýsköpunarverðlaun Íslands eru veitt af Rannís, Íslandsstofu, Nýsköpunarmiðstöð Íslands og Nýsköpunarsjóði atvinnulífsins, til fyrirtækja sem þykja hafa skarað fram úr í þróun nýrrar vöru eða þjónustu, sem byggð er á rannsóknar- og nýsköpunarstarfi og náð hefur árangri á markaði. Tilgangur verðlaunanna er að vekja athygli á þeim mikilvægu tengslum sem eru á milli rannsókna og þekkingaröflunar og aukinnar verðmætasköpunar í atvinnulífinu. Verðlaunagripurinn er stytta af frjósemisgoðinu Frey eftir Hallstein Sigurðsson myndhöggvara.
Við val á verðlaunahafa er litið til þess hvort um sé að ræða nýtt sprotafyrirtæki, hvort það sé byggt á nýskapandi tækni og hugmynd og sé kröfuhart á þekkingu. Þá er lagt mat á virðisauka afurða og hvort fyrirtækið hafi náð árangri á markaði. Metið er hvort líkur séu á að fyrirtækið haldi velli og hvort stjórnun nýsköpunar sé til eftirbreytni. Að lokum er metið hvort fyrirtækið sé hvatning fyrir aðra að feta sömu slóð.