„Við erum sjóður með langan líftíma og erum að stýra fjárfestingu okkar með virkum hætti. Það á enginn að vera undrandi á því að við skulum gæta hagsmuna okkar þegar við þurfum að gera það,“ segir Jóhannes Hauksson, framkvæmdastjóri Akurs fjárfestingasjóðs.
Líkt og mbl greindi frá bauð Steingrímur Erlingsson, stofnandi og fyrrverandi forstjóri Fáfnis Offshore, í lok janúar átta milljónir norskra króna, eða 119,8 milljónir króna, í rúman þrjátíu prósent hlut fjárfestingafélagsins Akurs í Fáfni Offshore og skuldbatt sig jafnframt til þess að kaupa aðra hluti á sama gengi.
Á hluthafafundi félagsins í gær var hins vegar samþykkt að fara í skuldabréfaútgáfu sem getur leitt til þess að kaupendur skuldabréfanna eignist allt að sextíu prósent hlut í félaginu á um 12,75 milljónir norskra króna, eða 190,9 milljónir íslenskra króna. Samkvæmt því er félagið í heildina metið á 21,25 milljónir norskra króna, eða 317 milljónir króna, og þar með minna en tilboð Steingríms hljóðaði upp á.
Frétt mbl.is: Höfnuðu hærra tilboði í Fáfni
Jóhannes segir tilganginn vera að koma með peninga að félaginu í því skyni að tryggja að smíðaverkefni Fáfnis Offshore, þ.e. Fáfnir Viking, verði fært í annað og sérstakt félag og frá hinu skipi félagsins, þ.e. Polarsyssel.
Aðspurður hvers vegna tilboði Steingríms hafi verið hafnað segist Jóhannes hafa talið að það væri ekki fullfjármagnað. „Við ákváðum bara að hafna fjárfestingunni og ég ætla ekkert að tjá mig meira um það. Mér fannst tilboðið ekki trúverðugt og ekki fullfjármagnað. En þar að auki leist okkur betur á að klára samninginn við sýslumanninn og halda áfram í þeim verkefnum sem við vorum í. Enda höfum við bolmagn til að gera það,“ segir Jóhannes.
Þjónustuskipið Polarsyssel, hefur verið í þjónustu fyrir sýslumanninn á Svalbarða í sex mánuði á ári en að sögn Jóhannesar var í gær samþykkt að lengja þann tíma upp í níu mánuði á ári. Verið er að klára samninga um það segir Jóhannes.
Aðspurður um áhættu og lélegar aðstæður á olíumarkaðnum í kjölfar lækkandi heimsmarkaðsverðs segir Jóhannes að félagið hafi vissulega orðið fyrir barðinu á því. „Polarsyssel var ætlað að vinna í sex mánuði á þessum markaði á móti samningnum við sýslumanninn. Nú höfum við lengt þann tíma upp í níu mánuði og höfum þar með ekki áhyggjur af því skipi,“ segir hann.
Hvað hitt skipið varðar segir Jóhannes að félagið sé að vinna að leið sem Steingrímur stakk upp á í upphafi. Að skoða möguleikann á því að breyta skipinu í þjónustuskip fyrir vindmillur.
Að sögn Jóhannesar verða útgefin skuldabréf einungis í boði fyrir núverandi hluthafa og ekki er því ætlunin að fá fleiri að rekstrinum. „Þetta eru bara þeir sem hafa verið að vinna að framgangi félagsins,“ segir hann.
Líkt og fram hefur komið á Steingrímur fimmtungshlut í Fáfni Offshore en honum var sagt upp sem forstjóra fyrirtækisins á síðasta ári. Spurður um uppsögnina segist Jóhannes ekki ætla að fjalla um málið. „Hann var ekki sammála þeirri leið sem meirihluti stjórnar vildi fara og ég ætla ekki að tjá mig neitt meira um það.“
Akur er framtakssjóður í rekstri Íslandssjóða, sjóðsstýringarfyrirtækis Íslandsbanka, og keypti 30 prósent hlut í Fáfni á 1.260 milljónir króna árið 2014. Helstu eigendur sjóðsins eru lífeyrissjóðir, Íslandsbanki og VÍS.
Þá á framtakssjóðurinn Horn II, sem er í rekstri Landsbréfa, einnig stóran hlut í Fáfni. Helstu fjárfestarnir í Horni II eru íslenskir lífeyrissjóðir.