Breski bankinn Barclays hefur verið ákærður í annað sinn af yfirvöldum í Bretlandi í tengslum við neyðarlán til bankans frá Katar þegar fjármálakreppan reið yfir heiminn árið 2008.
Um er að ræða einn ákærulið gegn dótturfélaginu Barclays Bank um ólöglega fjárhagsaðstoð, að því er kemur fram í frétt Financial Times.
Ákærur fyrir fjársvik voru lagðar fram í júní á hendur móðurfélaginu og fjórum lykilstarfsmönnum þess í tengslum við sama mál en nú beinist ákæran að þeim hluta fyrirtækisins sem hefur leyfi til bankastarfsemi og er háður því að breska fjármálaeftirlitið leggi blessun sína yfir starfsemina.
Málið snýst um að bankinn hafi lánað fjárfestum frá Katar þrjá milljarða Bandaríkjadala til að kaupa bréf í bankanum sjálfum sem hlut af 7,3 milljarða punda samkomulagi sem gert var í miðri fjármálakrísunni árið 2008.