Áætlað er að tekjuafkoma hins opinbera hafi verið jákvæð um 38,7 milljarða króna árið 2017 eða 1,5% af landsframleiðslu. Til samanburðar var afkoman jákvæð um 308 milljarða króna árið 2016 og neikvæð um 18,2 milljarða króna árið 2015.
Þetta kemur fram í frétt á vef Hagstofunnar. Þar segir að tekjur hins opinbera hafi numið um 1.110 milljörðum króna árið 2017. Sem hlutfall af landsframleiðslu mældust þær 43,4% samanborið við 57,8% árið 2016.
Miklar tekjur hins opinbera árið 2016 eru sagðar skýrast að mestu af 384 milljarða króna stöðugleikaframlagi frá slitabúum fallinna fjármálafyrirtækja. Til samanburðar námu tekjur hins opinbera 41,7% af landsframleiðslu árið 2015.
Útgjöld hins opinbera voru 1.070,9 milljarðar króna árið 2017 og drógust þau saman um 3,5% milli ára. Meðtalið í gjöldum hins opinbera árið 2016 er fjármagnstilfærsla ríkissjóðs til Lífeyrissjóðs starfsmanna ríkisins upp á 105 milljarð króna. Útgjöld hins opinbera voru 41,9% af landsframleiðslu samanborið við 45,2% árið 2016.
Samkvæmt áætlun út frá greiðslutölum námu peningalegar eignir hins opinbera 42,4% af landsframleiðslu í árslok 2017 meðan áætlað er að heildarskuldir hins opinbera hafi verið 74,0%. Fara þarf aftur til ársins 2007 til að finna lægra skuldahlutfall.
Hagstofan hefur gefið Hagtíðindi um fjármál hins opinbera árið 2017.