Arion banki hefur framselt stóran hluta af atkvæðisrétt sínum í Vátryggingafélagi Íslands til fjárfestingafélagsins Óskabeins sem er einn stærsti hluthafinn í tryggingafélaginu.
Þetta kemur fram í tilkynningu til Kauphallarinnar.
Arion banki veitir Óskabeini fullt umboð til þess að fara með atkvæðisrétt sem fylgir 90 milljónum hluta sem jafngilda 4,05% af útgefnu hlutafé á aðalfundi VÍS sem fer fram á fimmtudaginn í næstu viku.
Framsalið felur í sér að Óskabein fer með rúmlega 135 milljónir atkvæða á fundinum sem jafngilda 6,08% hlut en Arion banki heldur eftir rúmum 25 milljónum atkvæða, eða um 1,13%. Umboðið fellur niður að fundi loknum og atkvæðisréttur gengur aftur til Arion banka. Þá mun bankinn aftur fara með atkvæðisrétt fyrir rúmlega 115 milljónum hluta, eða 5,18%.
Óskabein er í eigu Andra Gunnarssonar, Engilberts Hafsteinssonar, Fannars Ólafssonar, Gests Breiðfjörð Gestssonar og Sigurðar Gísla Björnssonar og er meðal annars einn stærsti einstaki eigandi Vátryggingafélags Íslands.