Frumvarp um breytingu á lögum um Íslandsstofu sem gefur stofnuninni undanþágu frá samkeppnislögum hefur verið lagt fram á Alþingi. Að mati Samkeppniseftirlitsins gæti undanþága þessi gert Íslandsstofu kleift að ákveða samkeppnishömlur eða hvetja til samkeppnishindrana.
Frumvarpið var lagt fram af utanríkisráðherra. Fyrsta umræða hefur farið fram og gekk málið til utanríkisnefndar. Í frumvarpinu eru færð rök fyrir því að gildissvið samkeppnislaga nái ekki til Íslandsstofu þar sem starfsemi stofnunarinnar taki ekki til samninga sem ætlað er að hafa áhrif hér á landi.
„Yrði ákvæðið að lögum væri Íslandsstofu, sem samtök[um] fyrirtækja, heimilt að ákveða samkeppnishömlur eða hvetja til hindrana sem bannaðar eru samkvæmt samkeppnislögum. Þá kynni að rísa vafi [um] hvort samráð fyrirtækja á vettvangi Íslandsstofu væri ólögmætt,“ segir í umsögn Samkeppniseftirlitsins.
Bendir Samkeppniseftirlitið á að engan rökstuðning sé að finna í frumvarpinu fyrir nauðsyn þess að kippa samkeppnisögum úr sambandi að þessu leyti. Þá séu engar skýringar á því hvað slík undanþága felur í sér eða hvað liggi að baki henni.
Mælist Samkeppniseftirlitið alfarið gegn því að starfsemi Íslandsstofu verði undanþegin samkeppnislögum. Enn fremur færir eftirlitið rök fyrir því að ráðagerðin fari í bága við EES-samninginn.