Landsbankinn hefur sett rúman helming af hlut sínum í fjárfestingarfélaginu Eyri Invest hf. í sölu. Um er að ræða 12,1% hlut en tilkynnt var um að bankinn ætlaði að selja allan hlut sinn í félaginu árið 2016.
Á vef bankans kemur fram að Eyrir Invest hf. er fjárfestingarfélag sem stofnað var árið 2000. Langstærsta eign Eyris Invest hf. er 25,9% eignarhlutur í Marel hf. Eyrir Invest hf. á einnig tæpan helmings hlut í Eyri Sprotum slhf., fjárfestingarfélagi sem fjárfestir í nýsköpunarfyrirtækjum, og um þriðjungshlut í Efni ehf., sem sérhæfir sig í að byggja upp nýjar markaðs- og söluleiðir fyrir fyrirtæki í gegnum netsölu og samfélagsmiðla.