Birgir Jónsson, forstjóri Íslandspósts, segir fyrirtækið munu loka öllum dreifingarstöðum á höfuðborgarsvæðinu nema póstmiðstöðinni á Stórhöfða. Þá verði stjórnendum fækkað og skref stigin í átt að því að nútímavæða pósthúsin og þjónustuna með þróun stafrænnar tækni.
Í samtali í ViðskiptaMogganum í dag segir Birgir yfirbyggingu félagsins hafa verið of kostnaðarsama.
„Hér hefur ekki verið sami agi á almennum rekstri og hjá mörgum fyrirtækjum. Ég veit ekki hvort það endurspeglar eignarhaldið eða hvort þetta er gömul stofnanamenning,“ segir Birgir. Félagið hafi lítinn tíma til að taka rækilega til fyrir afnám einkaréttar frá og með 1. janúar nk.