Ægir Þorsteinsson, framkvæmdastjóri Hopps, sem leigir stöðvalaus rafmagnshlaupahjól í Reykjavík, segir viðtökurnar fyrstu þrjár vikurnar hafa verið langt framar vonum. „Við höfum í raun verið að lenda í því jákvæða vandamáli að hjólin eru öll batteríslaus á kvöldin,“ segir Ægir en fyrirtækið er með 60 hlaupahjól til taks fyrir borgarbúa.
„Við sáum að fyrstu vikuna var búið að fara rúmlega 10 hringi um Ísland á 60 hjólum. Við höfum þurft að sækja nánast öll hjólin á hverjum degi vegna þessarar miklu eftirspurnar, svo hægt sé að nýta þau næsta dag,“ segir Ægir.
Fyrirtækinu er umhugað um umhverfisvænar samgöngur en Hopp er með teymi sem fer um á rafmagnssendibíl sem sér um að koma hjólunum í hleðslu á kvöldin, sem síðan dreifir þeim á ný um borgina.
„Við erum með ákveðna staði sem við köllum hreiður sem við setjum þau á. Við setjum hjólin á mismunandi staði eftir því hvort það er virkur dagur eða helgi. Þarfirnar eru því aðeins mismunandi en við getum, út frá notkun í appinu, séð hvar þörfin er mest og stillt upp hreiðrum á viðeigandi stöðum og þannig leyft notendum okkar að stjórna hvar hjólin eru,“ segir Ægir. Veturinn leggst vel í Ægi. „Við stefnum á að hafa opið í vetur en við gætum öryggissjónarmiða og ef það er ekki öruggt að vera á hjólinu munum við loka appinu tímabundið og taka hjólin mögulega af götunni.“