Rekstur Regins „samkvæmt áætlun“

Rekstur fasteignafélagsins Regins „gengur vel og er samkvæmt áætlun“, en svo segir í tilkynningu frá félaginu, sem í dag kynnt árshlutareikning sinn fyrir fyrstu níu mánuði ársins. Rekstrartekjur á tímablinu námu 7.282 milljónum króna og voru leigutekjur, sem hækka um 26% frá sama tímabili í fyrra, 6.845 milljónir af þeirri upphæð.

Rekstrarhagnaður fyrirtækisins fyrir matsbreytingu og afskriftir (EBITDA) nam 4.999 milljónum króna og jókst um 33% á milli ára. Eftir tekjuskatt var hagnaður félagsins 3.51 milljónir króna sem er um 55% hækkun frá fyrra ári. Allt þetta kemur fram í tilkynningu Regins til Kauphallar, sem barst eftir lokun markaða í dag.

„Eftirspurn eftir atvinnuhúsnæði til leigu hefur verið mjög góð og náðst hefur mikill og góður árangur í útleigu til opinberra aðila og sterkra félaga. Það sem af er ári hafa verið gerðir nýir leigusamningar fyrir um 38 þús. m2 . Þar af er endurnýjun eldri samninga um 24%,“ segir í tilkynningu félagsins.

Þar kemur einnig fram að Kvika banki hafi tekið á leigu 3.500 fermetra höfuðstöðvar í Katrínartúni 2 fyrr í haust. Unnið er að frágangi þess húsnæðis og verður það afhent bankanum á næstu vikum.

Alls átti Reginn 117 fasteignir í lok september og var heildarfermetrafjöldi eignanna um 377 þúsund. Um 97% þessara eigna eru í útleigu, en fyrirtækið gerir ráð fyrir því að nýtingarhlutfallið verði í lok árs allt að 98%, þar sem vegna fjölda nýrra leigusamninga standi nú yfir mikil umbreyting í stórum leigueiningum, til dæmis að Höfðatorgi, Suðurhrauni 3, Skútuvogi 2 og Miðhrauni 4.

Helgi S. Gunnarsson forstjóri Regins mun kynna afkomu félagsins á opnum kynningarfundi í höfuðstöðum félagsins í Hagasmára 1 kl. 8:30 í fyrramálið.

Tilkynning Regins um uppgjörið

Árshlutareikningur Regins fyrir fyrstu níu mánuði ársins

Fjárfestakynning um uppgjör ársfjórðungsins

• Blogga um frétt