Indigo stórminnkar hlut sinn í Wizz

Stærsti hluthafi ungverska lággjaldaflugfélagsins Wizz Air, bandaríska fjárfestingarfélagið Indigo Partners, hefur minnkað hlut sinn í Wizz Air í takt við reglur Evrópusambandsins um eignarhald flugfélaga. Indigo Partners átti í viðræðum á sínum tíma um að kaupa hlut í WOW air, mánuðina fyrir fall félagsins.

Frétt af mbl.is

Indigo mun eignast 49% hlut í WOW air

Bill Franke, stofnandi og forstjóri Indigo Partners, er formaður stjórnar Wizz Air. Eins og segir í frétt Reuters fer hlutur Indigo úr 20,6% niður í 3,4% hlut. Um er að ræða 12,5 milljónir hluta sem seldir voru á 3,5% lægra gengi en lokagengi félagsins var í kauphöll í gær, mánudag. Söluandvirðið nemur um 650 milljónum Bandaríkjadala, eða jafnvirði rúms 81 milljarðs íslenskra króna. Indigo Partners á 2,5 milljónir hluta í Wizz Air eftir söluna.

Þurfa að vera í evrópskri eigu að 50% hluta

Flugfélög þurfa að vera að 50% hluta í eigu aðila innan Evrópska efnahagssvæðisins og Sviss til að mega fljúga innan svæðisins. Eftir útgöngu Breta úr ESB teljast breskir fjárfestar í Wizz Air nú til fjárfesta utan Evrópska efnahagssvæðisins, sem skýrir hve stóran hlut hið bandaríska Indigo selur nú í félaginu. 

Wizz, sem haldið hefur úti áætlunarflugi til og frá Íslandi, er atkvæðamest í Mið- og Austur-Evrópu. Félagið sagði í apríl í fyrra að það hygðist safna hlutafé frá evrópskum fjárfestum í þeim tilgangi að ná að falla undir reglur ESB um eignarhald. Að öðrum kosti gæti það misst réttinn á að fljúga innan ESB eftir Brexit.

Wizz Air hækkaði afkomuspá sína fyrir síðasta ár á dögunum, eftir að í ljós kom að þriðji ársfjórðungur gekk betur en áætlanir höfðu gert ráð fyrir, og félagið seldi fleiri miða en spáð var.

• Blogga um frétt