Gullverð aldrei verið hærra

Verð á gulli hefur aldrei verið hærra en í dag, á sama tíma og fjárfestar hafa sóst í öruggt skjól fyrir afleiðingum vaxandi spennu milli stjórnvalda Bandaríkjanna og Kína, fjölgun tilfella kórónuveirunnar og hægagangi á nýjum aðgerðapakka í þinghúsinu í Washington.

Aðgerðir Seðlabanka Bandaríkjanna hafa dýft bandaríkjadal lægra gagnvart flestum öðrum gjaldmiðlum. Á sama tíma hefur verð á gulli flogið upp í nýjar hæðir og náði í morgun 1.944,71 bandaríkjadal, fyrir hverja únsu af eðalmálminum. Verðið hefur þó lækkað aðeins síðan.

Fyrra metið nam 1.921,18 bandaríkjadölum og var það sett árið 2011.

Augu fjárfesta eru á næsta stefnufundi Seðlabankans, sem verður í þessari viku, og búast einhverjir þeirra jafnvel við því að bankinn muni grípa til neikvæðra stýrivaxta. Slík aðgerð gæti sett enn meiri þunga á gjaldmiðilinn og þar með fleygt gullverði upp yfir tvö þúsund dali.

• Blogga um frétt