Nýtt verkefni fer vel af stað

Hönnunar- og markaðsstofan Chili er að fara af stað með verkefni er snýr að því að aðstoða fyrirtæki við miðlun á umhverfisstefnu og öðru er viðkemur umhverfismálum. Þannig bindur stofan vonir við að hægt verði að mæta sístækkandi hópi viðskiptavina sem óska eftir umræddri þjónustu. 

„Ein helsta ástæðan fyrir því að við fórum af stað með þetta verkefni er að við fundum fyrir því að fyrirtæki, stofnanir og sveitarfélög eru að verða fyrir meiri pressu frá samfélaginu í öllu er viðkemur umhverfis- og loftlagsmálum,“ segir Daði Daníelsson, verkefnastjóri Chili, og bætir við að ljóst sé að mikil vakning hafi orðið í samfélaginu. 

Að hans sögn hefur verkefnið farið vel af stað. „Viðtökurnar hafa verið jákvæðar. Flestir eru meðvitaðir um þessi mál og mikilvægi þeirra, en því miður hafa þau setið á hakanum eða verið aftarlega í goggunarröðinni hjá mörgum. Sumir eru síðan komnir langt með sín mál og eru mjög meðvitaðir um þetta, sem okkur þykir frábært,“ segir Daði sem bindur vonir við að fleiri fyrirtæki feti þessa braut.

Landslagsmynd. Ljósmynd/Gunnar Sigurðsson

• Blogga um frétt