Sárabætur fyrir Lucky Charms?

Morgunkornið Lucky Charms hefur ekki verið fáanlegt í verslunum á Íslandi svo mánuðum skiptir. Nú er Bónus farinn að selja bandaríska morgunkornið Marshmallow Mateys, að því er virðist í sárabætur fyrir skortinn á Lucky Charms.

Ekki er að sjá að munur sé á uppskriftinni á milli tegundanna, heldur er í báðum pökkum um að ræða heilkornamorgunkorn í ætt við Cheerio’s, með sykurgljáa og í bland við litríka og fjölbreytta sykurpúða. Hver sykurpúði táknar ákveðinn lukkugrip, hvort sem það er regnbogi eða fjögurra laufa smári.

Frétt af mbl.is

Lucky Charms ófáanlegt á Íslandi

Tilkoma nýs samheitamorgunkorns kann ekki góðri lukku að stýra um framhald Lucky Charms á Íslandi. Í Morgunblaðinu í desember sagði markaðsstjóri innflytjandans að vera kynni að morgunkornið verði einfaldlega ekki fáanlegt á landinu í bráð. Framleiðandinn ber fyrir sig skakkaföll af völdum kórónuveirunnar.

Lucky Charms hefur selst vel á Íslandi í samfleytt rúm 20 ár og var fyrst flutt til landsins töluvert fyrr, þó í minna mæli. Það virðist hafa kvatt sviðið um sinn og þá er spurning hvort staðgönguefni þess, Marshmallow Mateys, standi undir nafni.