Bónus ætlar ekki að frysta verð

Bónus ætlar ekki að frysta verð á vörum sínum á sama hátt og Krónan ætlar að gera til þess að sporna gegn verðbólgu.

Guðmundur Marteinsson, framkvæmdastjóri Bónus, segir í samtali við mbl.is að Bónus sé alla daga að sporna við verðhækkunum.

Hann segir að framtak Krónunnar sé flott en telur að vægi þessara vara sé lítið í heildar körfunni.

Frétt af mbl.is

Krónan frystir verð þessara vara

„Þetta er flott framtak hjá þeim en lyktar smá af markaðsplotti,“ segir Guðmundur.

„Hvað varðar Bónus þá erum við að vinna í því alla daga að sporna við verðhækkunum eins og við getum þó neytendur finni kannski ekki alltaf fyrir því í innkaupunum sínum enda síðustu mánuðir verið erfiðir í allri hrávöru.“

Bónus eigi þátt í að halda verðbólgu niðri

Guðmundur vill meina að Bónus eigi þátt í því að verðbólgan hér á landi sé ekki meiri en hún er. Hann gagnrýnir að eigið húsnæði sé tekið með í verðbólgumælingar á Íslandi.

„Eitt vil ég þó benda á við þessar verðbólgumælingar en það er sú séríslenska aðferð að hafa húsnæðisliðinn þar inni en hann er ekki inni í samræmdri vísitölu ESB.

Ef við myndum mæla vísitöluna hérna eins og í ESB þá væri næst minnsta verðbólga á Íslandi, 6,4% í stað 9,9%, og mitt mat er að Bónus eigi smá hlut í þeim árangri án þess að á nokkurn sé hallað,“ segir Guðmundur að lokum.

• Blogga um frétt