Afkoma Skeljar langt umfram væntingar

Útlit er fyrir að afkoma fjárfestingafélagsins Skeljar í fyrra verði verulega umfram væntingar, eða næstum því tvöföld vænt afkoma. Frá þessu er greint í jákvæðri afkomuviðvörun sem send var á Kauphöllina nú fyrir stuttu.

Segir þar að drög að ársuppgjöri félagsins liggi fyrir og samkvæmt þeim muni afkoma eftir skatta nema á bilinu 14,5 til 15 milljörðum. Vísað er til þess að afkomuspá sem birt var með uppgjöri fyrsta ársfjórðungs í fyrra hafi áætlað að hagnaður gæti verið á bilinu 7,6 til 8,3 milljarðar.

Er ástæðan fyrir þessar breytingu fyrst og fremst hagnaður vegna uppfærðs verðmats á óskráðum fjárfestingaeignum félagsins upp á 9,8 milljarða, en áætlað eigið fé Skeljar í árslok er á bilinu 33 til 33,5 milljarðar.

Skel á meðal annars félögin Orkuna, Löður, Skeljung og Gallon, auk 58% hluts í Lyfjavali. Undir rekstur Orkunnar falla 70 eldsneytisstöðvar og verslunarrekstur á stöðvunum undir merkjum Orkunnar, 10-11 og Extra. Þá á Orkan Löður að fullu, Íslenska vetnisfélagið, 34% hlut í Straumalind og eignarhlut í félögum í veitingarekstri undir merkjum Braut og co, Gló og Sbarro. Hluturinn í Lyfjavali heyrir einnig undir Orkuna.

Löður rekur 15 bílaþvottastöðvar, þar af 13 á höfuðborgarsvæðinu. Skeljungur sinnir sölu og þjónustu við fyrirtæki með eldsneyti, efnavöru og áburð, en félagið á einnig 67% hlut í Barki, 33% hlut í EAK, 33% í Fjölveri og 67% hlut í Ecomar.

Gallon á og rekur orkuinnviði eins og sex birgðastöðvar víða um land. Eru birgðatankar félagsins samtals 36 talsins og geymslurými fyrir um 90 milljónir lítra af eldsneyti. Gallon á einnig 25% hlut í EBK.

Félagið mun birta ársuppgjör 2022 eftir lokun markaða þann 7. Febrúar.

Ásgeir Helgi Reykfjörð Gylfason, forstjóri Skel fjárfestingafélags.

• Blogga um frétt