Nýir eigendur taka við Origo á morgun

Nýir eigendur munu eignast 63% hlut í Origo að loknu valfrjálsu tilboði til annarra hluthafa félagsins. Hér er um að ræða félagið AU 22 ehf., sem er í eigu Umbreytingar II slhf., framtakssjóðs í rekstri Alfa framtaks.

Félagið keypti um fjórðungshlut í Origo um miðjan desember sl. og lagði í kjölfarið fram valfrjálst tilboð til annarra hluthafa. Þegar tilboðið var formlega lagt fram, um miðjan janúar sl., hafði AU 22 ehf. eignast tæplega 30% hlut í félaginu. Valfrjálsa tilboðið var lagt fram á genginu 101 kr. á hlut.

Frétt af mbl.is

Formlegt tilboð lagt fram í Origo – afskráning staðfest

Um helmingur hluthafa Origo samþykkti tilboðið og bárust samþykki fyrir sem nemur 33,7% alls hlutafjár.

Í flöggun til Kauphallarinnar síðdegis í gær kom fram að Birta lífeyrissjóður, sem átti um 10,9% hlut fyrir tilboðið, hefði selt sig niður í 6,4% hlut. Þá seldu Lífeyrissjóður verslunarmanna (sem átti 10% hlut) og lífeyrissjóðurinn Stapi (sem átti 7,2% hlut) alla sína hluti í félaginu. Þá hafði Samkeppniseftirlitið tilkynnt AU 22 ehf. að ekki væru forsendur til þess að aðhafast vegna tilboðsins og þar með var eina skilyrði tilboðsins uppfyllt.

Greiðsla til þeirra sem samþykktu tilboðið og afhending hluta til AU 22 ehf. fer fram á morgun, 1. mars. AU 22 ehf. hefur því öðlast yfirráð í Origo hf. í skilningi laga en er þó ekki skylt að gera yfirtökutilboð í félagið.

Frétt af mbl.is

Yfirtökuskylda mun ekki skapast í Origo

Gunnar Páll Tryggvason, framkvæmdastjóri Alfa framtaks, sagði mörg tækifæri blasa við hvað viðkemur Origo í viðtali við Dagmál á mbl.is í byrjun febrúar. Fyrir liggur vilji nýrra eigenda til að skrá félagið af markaði en Origo er í dag minnsta skráða félagið í Kauphöllinni.