Fimm verslanir Bestseller á Íslandi hafa ákveðið að leggja sitt af mörkum til að sporna við frekari verðlagshækkunum og hærri verðbólgu með því að lækka vöruverð um 10% í þessum mánuði.
Verslanirnar eru Vero Moda, Jack & Jones, VILA, Selected og Name It. Í tilkynningu Bestseller kemur fram að launa- og kostnaðarverðshækkanir hjá fyrirtækjum virðist vera velt beint út í verðlagið sem mælist í hærri verðbólgu og aftur setur þrýsting á enn frekari launahækkanir. Það þurfi sameiginlegt átak ríkis, launþega og atvinnulífs til þess að snúa þessari þróun við.
„Við áttum okkur á því að verðbólgan er sameiginlegt verkefni okkar allra og hún kemur illa niður á samfélaginu í heild. Það er okkar skoðun að allir verði að leggja sitt af mörkum til að draga úr verðlagshækkunum og hægja á þeirri verðlagsþróun sem við höfum séð undanfarna mánuði. Við skorum á önnur fyrirtæki að gera slíkt hið sama,“ er haft eftir Hrefnu Lind Heimisdóttur, framkvæmdastjóra Bestseller, sem rekur ofangreindar verslanir.