Fiskeldið greiði milljarð í auðlindagjald

Innheimta skatta og gjalda á fiskeldi verður aukin frá því sem nú er og lagt var til í tillögum starfshóps um stefnumótun í fiskeldi sem skilaði tillögum á síðasta ári, verði ný frumvörp sjávarútvegs- og landbúnaðarráðherra að lögum.

Frumvörpin eru tvö. Annars vegar um álagningu auðlindagjalds á fiskeldi og hinsvegar breytt frumvarp um breytingar á ýmsum lögum um fiskeldi. „Það vekur athygli að í báðum frumvörpunum er boðuð aukin gjaldtaka. Greinilega er verið að bæta talsvert í,“ segir Einar K. Guðfinnsson, formaður Landssambands fiskeldisstöðva.

Í drögum að frumvarpi um nýtingu eldissvæða í sjó er gert ráð fyrir greiðslu 15 króna gjalds af hverju kílói fisks sem fyrirtækin hafa leyfi til að ala. Fyrirtækin greiða í dag ekki sérstaklega fyrir þessi afnot. Gjaldið er fyrirhugað að leggja á árið 2020. Það verði lægra fyrstu árin en fullt gjald verði sett á árið 2023.

Í skýrslu starfshóps um stefnumótun í fiskeldi sem fulltrúar fiskeldis og veiðréttarhafa áttu sæti í var samkomulag um slíkt gjald, 15 krónur á kíló. Það átti hins vegar að leggjast á hvert framleitt kíló, ekki ónotaðan lífmassa í leyfum, og gefa átti sex ára umþóttunartíma frá því að slátrun hefst til að gefa fiskeldinu kost á að fjárfesta og byggja sig upp, að því er fram kemur í fréttaskýringu um fiskeldið í Morgunblaðinu í dag.