Big Bang Theory-stjarnan Melissa Rauch þurfti að vera á FaceTime með eiginmanni sínum þegar hún fæddi son þeirra Brooks í heiminn.
Eiginmaður Rauch, Winston Beigel, hefði getað verið við hlið hennar í fæðingunni en vegna kórónuveirunnar gátu þau ekki fengið pössun fyrir dóttur sína Sadie sem er 2,5 árs. Litli drengurinn kom í heiminn í Los Angeles í Bandaríkjunum og hafa konur leyfi til þess að hafa eina manneskju með sér í fæðinguna.
Hjónin fundu þó lausn á þessu og gat Rauch hringt myndsímtal í manninn sinn á meðan hún kom litla drengnum í heiminn.
Í færslu á Instagram segist hún hafa fundið mikið fyrir þessum sérstöku aðstæðum á síðustu metrunum meðgöngunnar og svo að sjálfsögðu í fæðingunni. Hún segist hafa verið mjög stressuð fyrir fæðingunni þar sem mikil óvissa ríkti um hvernig aðstæður yrðu á sjúkrahúsinu.
„Ég átti góða daga þar sem ég var jákvæð og hugsaði með mér að ég gæti þetta. Aðra daga fannst mér þetta algjört helvíti. Kvíðinn yfir því að þurfa að fæða án þess að hafa einhvern með mér til að styðja mig, auk kvíðans yfir að fara á spítala á tímum heimsfaraldurs, þetta var frekar mikið. Þannig ég reyndi mitt besta til að undirbúa mig fyrir aðstæður sem ég hélt ég þyrfti aldrei að vera í: fyllti spítalatöskuna með sótthreinsiklútum og æfði haföndun með andlitsgrímu eins og ég væri að æfa mig fyrir maraþon í dystópíu,“ skrifaði Rauch.
Hún segist á endanum hafa náð að róa sig niður þegar hún áttaði sig á að hún hefði félaga sem væri með henni í þessu.
„Ég á félaga. Sá hinn sami og hefur hlustað á hjartslátt minn innanfrá í 9 mánuði. Það hjálpaði mér einhvernvegin. Mér leið vel að hugsa til þess að þetta væri okkar fyrsta ævintýri saman,“ skrifaði Rauch.