Hin átta ára gamla leikkkona Margrét Júlía Reynisdóttir var valin besta unga leikkonan á KIKIFe, einni stærstu barnakvikmyndahátíð í suður Þýskalandi. Verðlaunin hlaut hún fyrir hlutverk sitt í kvikmyndinni Birtu, en þar fer hún með hlutverk Kötlu, litlu systur Birtu.
Þetta eru önnur verðlaunin á rúmri viku sem kvikmyndin Birta hlýtur en aðalleikkona myndarinnar Kristín Erla Pétursdóttir, 12 ára sem leikur sjálfa Birtu var valin besta leikkonan á Schlingel barnamyndahátíðinni hinn 16. október síðastliðinn.
KIKIFe hátíðin hefur í sinni 30 ára sögu skipað sér stóran sess í þýska kvikmyndaiðnaðinum. Á hátíðinni eru sýndar hágæða kvikmyndir hvaðanæva að úr heiminum og sex þeirra komast í forval um verðlaunasæti.
Birta í leikstjórn Braga Þórs Hinrikssonar verður frumsýnd í kvikmyndahúsum á Íslandi þann 5. nóvember n.k. og á Símanum Premium 25. nóvember.