Niðurstöður rannsóknar svissneska bankans UBS gefa til kynna að fjölgun flugfarþega verði minni á næstu árum en spár hafa gert ráð fyrir. BBC greinir frá.
Bankinn rekur það meðal annars til aukins „flugviskubits“ á meðal flugfarþega en einn af hverjum fimm sem svöruðu könnuninni sögðu að þeir hefðu fækkað flugferðum sínum vegna þeirra áhrifa sem þær hafi á umhverfið.
Rannsókn UBS náði til yfir 6 þúsund manns í Bandaríkjunum, Þýskalandi, Frakklandi og Bretlandi.
Flugfarþegum hefur fjölgað um 4 til 5 prósent á milli ára síðustu ár, sem þýðir að fjöldinn tvöfaldast á hverjum 15 árum. UBS segir að miðað við niðurstöður könnunarinnar muni fjölgunin verða helmingi minni en spár gera ráð fyrir.
Framtíðarspár frá fyrirtækjum í iðnaðinum höfðu gert ráð fyrir að fjölgunin verði stöðug til ársins 2035. UBS-rannsóknin gefur hins vegar til kynna að áhrifamiklar hreyfingar, líkt og loftslagsverkfall hinnar sænsku Gretu Thunberg, geti haft mikil áhrif á flugferðir fólks. Þá sérstaklega í Evrópu og Bandaríkjunum.