Margir Íslendingar slógu til eftir að samkomutakmörkunum var aflétt hérlendis í júní og keyptu sér flugmiða til útlanda. Mánuði síðar er staðan hins vegar orðin önnur og Ísland nú orðið appelsínugult á korti sóttvarnastofnunar Evrópu sem var uppfært í dag. En hvað þýðir það fyrir ferðalög á helstu áfangastaði Íslendinga?
Við ferðalög til Bretlands þarf fólk að sýna fram á neikvætt Covid-próf sem er innan við 72 klst. gamalt. Frá og með mánudeginum 2. ágúst þarf ferðalangur sem er bólusettur eða hefur verið útsettur fyrir smiti að sýna fram á vottorð og neikvætt próf við komuna til landsins ásamt því að taka PCR-próf á öðrum degi komuna til Bretlands.
Fyrir þann tíma þurfa allir að fara í að minnsta kosti átta daga sóttkví þar sem eru tekin sýni á öðrum og áttunda degi. Sú regla mun áfram gilda fyrir óbólusetta. Sjá á vefnum gov.uk.
Uppfært: Ísland er enn á grænum lista í Bretlandi, enda er þar ekki notast við sömu litaflokkun og sóttvarnarstofnun Evrópu. Búast má við því að næsta uppfærsla Breta verði um miðja næstu viku.
Danir skipta litakóðuninni í fernt og uppfæra listann á sunnudögum. Síðasta sunnudag var Ísland flokkað sem grænt og landsmenn þurfa því einungis að sýna fram á bólusetningarvottorð, vottorð um fyrri sýkingu eða neikvætt Covid-próf við komuna til Danmerkur. Þetta gæti þó breyst á næstu dögum. Sjá á vefnum coronasmitte.dk.
Bólusettir þurfa einungis að sýna bólusetningarvottorð við komuna til Frakklands. Óbólusettir þurfa hins vegar að hafa mikilvæga ástæðu fyrir komunni til landsins, hafa neikvætt Covid-próf sem er innan við 72 klukkustunda gamalt og fara í sóttkví í sjö daga. Sjá frétt á vef the Connexion.
Á Ítalíu þarf að sýna bólusetningarvottorð, vottorð um fyrri sýkingu eða neikvætt Covid-próf við komuna til landsins. Sjá á vefnum italia.it.
Á Spáni þarf einnig að sýna bólusetningarvottorð, vottorð um fyrri sýkingu eða neikvætt Covid-próf við komuna til landsins. Þá þarf að fylla út form á vefnum spth.gob.es.
Vert er að nefna að þegar landsmenn koma heim þurfa bólusettir, rétt eins og óbólusettir, að framvísa niðurstöðum úr Covid-prófi áður en þeir halda til landsins. Kort sóttvarnastofnunar Evrópu uppfærist einu sinni í viku og verður Ísland líklega orðið rautt í næstu viku vegna nýgengis smita.