Duran Duran sópar til sín verðlaunum

Poppsveitin Duran Duran hlýtur sérstök heiðursverðlaun á næstu Brit-tónlistarhátíð, sem fram fer 17. febrúar á næsta ári. Duran Duran, sem náði mestum vinsældum á 9. áratug 20. aldar, hefur selt rúmlega 70 milljónir breiðskífna frá upphafi ferils sveitarinnar. Einkum náðu breiðskífurnar "Rio" og "Seven and The Ragged Tiger" miklum vinsældum.

Flestir upphaflegu liðsmenn sveitarinnar voru hættir, fyrir utan Simon Le Bon og Nick Rhodes, þegar þeir ákváðu að koma allir saman aftur fyrir nokkrum mánuðum. Aðrir í sveitinni eru Andy Taylor, John Taylor og Roger Taylor. Verulegur áhugi er fyrir tónleikum sveitarinnar og hefur verið uppselt á þá alla hingað til, að sögn BBC.

Duran Duran, sem hlaut einnig heiðursverðlaun á tónlistarhátíð MTV fyrir nokkrum mánuðum, hyggst senda frá sér nýja breiðskífu næsta vor.

Meðlimir Duran Duran voru viðstaddir Myndbandaverðlaun MTV en þeir fengu sérstök heiðursverðlaun. Reuters

• Blogga um frétt