Nýtt verk eftir Tyrfing í haust

Tyrfingur Tyrfingsson.
Tyrfingur Tyrfingsson. mbl.is/Eggert Jóhannesson

Kartöfluæturnar er nýtt íslenskt verk eftir Tyrfing Tyrfingsson sem verður frumsýnt á Litla sviði Borgarleikhússins í september. Áður hefur Borgarleikhúsið sýnt eftir hann leikritin Bláskjá og Auglýsingu ársins ásamt stuttverkinu Skúrinn á sléttunni, en Tyrfingur starfaði sem hússkáld Borgarleikhússins 2014 og 2015. Í Kartöfluætunum fjallar Tyrfingur um venjulega en jafnframt skrautlega íslenska fjölskyldu sem tekst á við meðvirkni, stjórnsemi og baráttuna við að lifa af. Örvænting, skömm, sektarkennd, leyndardómar og lygi koma við sögu og er þessum tilfinningum lýst með húmor og stíl sem einkenna höfundinn. Ólafur Egill Egilsson leikstýrir og leikarar eru Atli Rafn Sigurðarson, Edda Björg Eyjólfsdóttir, Gunnar Hrafn Kristjánsson, Sigrún Edda Björnsdóttir og Vala Kristín Eiríksdóttir.