Blaðamaður BBC hefur valið Utopia-tónleikaferðalag Bjarkar sem einn af mest spennandi tónlistarviðburðum ársins 2018. Þar segir að tónleikar Bjarkar hafi þróast yfir í eins konar tónlistarlegar listainnsetningar.
Menningarblaðamaðurinn Arwa Haider spáir í því mest spennandi á komandi tónlistarári, svo sem væntanlegri plötuútgáfu, viðburðum og upprennandi hæfileikafólki.
Efst á blaði í þeim viðburðum sem Haider velur er tónleikaferðalag Bjarkar þar sem hún kemur til með að fylgja eftir plötunni Utopia og skrifar Haider að búast megi við því að þar verði tónlistarleg- og sjónræn upplifun tekin á næsta stig. Tónleikaferðalag Bjarkar hefst þann 27. maí á All Points East hátíðinni í London.
Aðrir viðburðir sem nefndir eru eru meðal annars Reputation tónleikaferðalag Taylor Swift og Joanne tónleikaferðalag Lady Gaga.