Jon Snow og drekamóðirin Daenerys Targaryen, eða öllu heldur leikararnir Kit Harington og Emilia Clarke, eru mætt á klakann á ný. Tilefnið eru tökur á síðustu þáttaröðinni á Game of Thrones.
Frá þessu er greint á aðdáendasíðu þáttanna og vísað í Facebook-færslu aðdánda sem mætti þeim á flugvellinum. Þá hefur einnig verið staðfest að hárgreiðslumaður hafi fylgt Clarke til landsins.
Kit and Emilia in Iceland pic.twitter.com/3RaAluocdf
— Game of Photos (@gamofphoto) January 29, 2018
Tökur standa nú yfir á áttundu og síðustu þáttaröðinni. Ekki er vitað hversu umfangsmiklar tökurnar verða hér á landi að þessu sinni. Ísland hefur áður verið sögusvið þáttanna en íslensku landslagi hefur brugðið fyrir í þáttaröð tvö, þrjú, fjögur og sjö.
Clarke og Harington fara með stór hlutverk í þáttunum svo ljóst er að Ísland muni spila ákveðna rullu í þáttunum. Ekki hefur verið tilkynnt hvenær áttunda þáttaröðin verður frumsýnd, en Maisie Williams sem fer með hlutverk Arya Stark, sagði í viðtali í fyrradag að stefnt er að því að hefja sýningar í apríl á næsta ári.