Framlög Ísraels og Kýpur í Eurovision þetta árið eru gríðarlega vinsæl ef eitthvað er að marka áhorfstölur á Youtube. Bæði löndin komust áfram í úrslitin sem fara fram á laugardag.
Rúmlega tvær milljónir hafa horft á flutning Nettu frá Ísrael frá því í Lissabon á þriðjudag. Hún flytur lagið „Toy“ og þykir sigurstrangleg.
Fleiri hafa horft á Eleni Foureira frá Kýpur en lag hennar „Fuego“ hefur ekki verið jafn mikið í umræðunni um líklega sigurvegara. Áhorfendur á Youtube velta slíku lítið fyrir sér en 2,8 milljónir manna hafa horft á atriði hennar frá því á þriðjudag.
Tíu lög komust áfram í úrslit Eurovision á þriðjudag en í kvöld bætast tíu til viðbótar við þegar seinna undankvöldið fer fram. Auk þess eiga fimm lönd, Frakkland, Þýskaland, Bretland, Spánn og Ítalía, fast sæti í úrslitunum. Gestgjafarnir frá Portúgal verða svo að sjálfsögðu einnig meðal keppenda á úrslitakvöldinu.