Benedikt Erlingsson og Ólafur Egill Egilsson, handritshöfundar kvikmyndarinnar Kona fer í stríð, unnu til SACD-verðlaunanna, sem eru veitt af samtökum handritshöfunda og tónskálda, fyrir myndina á Critic's Week, sem er hliðardagskrá kvikmyndahátíðarinnar í Cannes.
Þar var myndin heimsfrumsýnd 12. maí.
Dómnefndin sem veitir SACD-verðlaunin er skipuð af kvikmyndagerðarfólki sem eru í stjórn SACD og fá handritshöfundarnir 5.000 evrur í verðlaun. Benedikt var viðstaddur hátíðina og veitti verðlaununum viðtöku, að því er kemur fram á vef Kvikmyndamiðstöðvar Íslands.
Kona fer í stríð segir frá kórstjóra á fimmtugsaldri sem ákveður að bjarga heiminum og lýsir yfir stríði gegn allri stóriðju í landinu. Hún gerist skemmdarverkamaður og er tilbúin til að fórna öllu fyrir móður jörð og hálendi Íslands, þar til munaðarlaus stúlka stígur inn í líf hennar.
Myndin hefur hlotið góða dóma í hinum ýmsu virtu kvikmyndatímaritum og hefur frammistaða aðalleikkona myndarinnar, Halldóru Geirharðsdóttur, fengið sérstakt lof.
Myndin verður frumsýnd hérlendis þann 22. maí.