Kron by Kronkron er sköpunarverk þeirra Hugrúnar Árnadóttur og Magna Þorsteinssonar. Magni sem er þekktur fyrir skemmtilega framkomu við alla þá sem heimsækja verslun þeirra reynist einnig þokkalegur dansari ef marka má Instagram þar sem hann dansar sig í gegnum Undraveröldina, sem þau hjónin hafa skapað í Hönnunarsafni Íslands.
Magni og Hugrún ætla að ljúka sýningunni Undraveröld með lokaballi í kvöld þriðjudaginn 18. september í Hönnunarsafni Íslands. Ballið verður frá klukkan 20:00 til 22:00 og mun salsa-hljómsveitin Mabolitos leika sambland af uppáhaldssalsa-númerum hljómsveitarinnar ásamt frumsömdum latínukvæðum.
Magni og fjölskylda eru greinilega búin að reima á sig dansskóna og byrjuð að hita upp fyrir ballið. Hjónin segja að sýningin sé búin að vera mögnuð. Að alls konar fólk sé búið að koma og njóta með þeim. Skátar, stjórnmálafólk, konur, karlar og óskilgreindir svo eitthvað sé nefnt. „Sýningin er blanda af bilun og ástríðu. Okkur þætti ótrúlega vænt um að sjá sem flesta með okkur á ballinu í kvöld!“