Síðustu vikur hafa ekki verið auðveldar fyrir Paris Jackson enda augu heimsins á föður hennar, Michael Jackson, eftir að heimildarmyndin Leaving Neverland kom út. Hin tvítuga fyrirsæta lét það ekki á sig fá og mætti á frumsýningu í Hollywood í gær, þriðjudag.
Verið var að frumsýna myndina The Dirt og mætti Jackson með kærasta sínum, tónlistarmanninum Gabriel Glenn. Sagan segir sögu Mötley Crüe en það var sjálfur Tommy Lee sem bauð Paris Jackson.
ET greinir frá því að lögreglan hafi staðfest að hringt hafi verið í sjúkrabíl vegna sjálfsvígstilraunar í kringum heimili Paris Jackson á laugardagsmorgun. Slökkviliðið í Los Angeles staðfesti svo að hafa flutt sjúkling á spítala. Heimildarmaður tengdur fyrirsætunni sagði hana hafa slasað sig heima hjá sér á laugardagsmorgun. Þurfti hún á læknishjálp að halda og dvaldi stutt á spítala. Jackson var mynduð seinna um daginn úti með kærasta sínum.