Aldrei séð jafnmarga á svæðinu

„Þetta var draumi líkast,“ segir Kristján Freyr Halldórsson, rokkstjóri tónlistarhátíðarinnar Aldrei fór ég suður, um gærkvöldið.

Frétt af mbl.is

Straumar og stefnur úr öllum áttum

Hann telur að aldrei hafi fleiri verið á svæðinu frá því að byrjað var að halda hátíðina á núverandi stað fyrir fimm árum síðan. Stemningin hafi náð hámarki um tíuleytið þegar Herra hnetusmjör og Jói Pé & Króli voru á sviðinu.

„Það er bara æðislegt fyrir okkur sem erum með fimmtán ára hátíð í farteskinu að við séum ekki dottin úr tísku,“ segir Kristján Freyr.

Tóku ofan fyrir Þormóði

Hann bætir við að í gærkvöldi hafi verið tekið ofan fyrir heimamanninum Þormóði Eiríkssyni, sem er lagasmiður og hefur starfað með Herra hnetusmjöri og Jóa Pé & Króla, enda sé hann „snillingur“. „Það er gaman að geta aðeins þakkað honum fyrir.“

Flytjendur á borð við Svölu og Mammút stíga á svið í kvöld og Jónas Sig lokar svo hátíðinni. Að sögn Kristjáns Freys er einnig mikil eftirvænting eftir tónleikum Ísfirðingsins Salóme Katrínar sem þykir afar efnileg. Með henni á sviðinu verða meðlimir úr hljómsveitinni Moses Hightower.

Kristján Freyr Halldórsson, rokkstjóri Aldrei fór ég suður. mbl.is/Hallur Már

Lögreglan heimilisleg

Rokkstjórinn segir hátíðina hafa farið vel fram og að takturinn sé góður bæði í gestunum og lögreglunni. „Ég er ánægður með lögregluyfirvöld. Þau eru heimilisleg í öllu, labba og spjalla við gestina. Þannig nákvæmlega viljum við hafa það enda er þetta fjölskylduhátíð.“

Lögreglan á Vestfjörðum var sammála því í samtali við blaðamann í morgun að hátíðin hefði farið vel fram til þessa og allt hafi gengið áfallalaust fyrir sig í gærkvöldi.

• Blogga um frétt