Loftlagsráðstefna á vegum Google var haldin á Sikiley á dögunum. Erlendir blaðamenn og Twitter-notendur hafa verið duglegir að hneyklast á ráðstefnunni og kalla hana hræsni að því fram kemur á vef Page Six.
Fram hefur komið að 114 einkaþotur hafi lent á flugvelli í Palermo á meðan ráðstefnan fór fram. Á meðal þeirra sem var boðið á ráðstefnuna eru stjórnur á borð við Leonardo DiCaprio, Katy Perry, Orlando Bloom, Harry Styles, Harry Bretaprins og annað ofurríkt fólk með aðgang að einkaþotum, þyrlum og snekkjum.
Engar myndir af ráðstefnunni hafa verið birtar á samfélagsmiðlum en stjörnur á borð við Katy Perry og Harry Styles voru þó myndaðar á miðvikudaginn koma á lúxuskerrum á hátíðarkvöldverð sem fram fór í dal hofanna á Sikiley þar sem Coldplay kom fram.
Á vef Daily Mail er því haldið fram að Harry Bretaprins hafi haldið ræðu berfættur um loftlagsbreytingar. Er hann jafnframt sagður hafa flogið til Sikileyjar með einkaþotu. Buckingham-höll hefur ekki viljað tjá sig um hvort að prinsinn hafi flogið með einkaþotu til ítölsku eyjunnar.