Tónlistarkonan og tískuhönnuðurinn Rihanna segist ekki hafa neinn tíma til að koma fram í hálfleik Ofurskálarinnar þar sem hún þurfi að klára plötu svo aðdáendur hennar hálshöggvi hana ekki.
Rihanna hefur haft í mörgu að snúast síðustu ár, og þá ekki á tónlistarsviðinu. Hún hefur framleitt snyrtivörur og nærföt og opnaði sitt eigið tískuhús í París fyrr á árinu.
Tónlistarkonan hefur gefið út átta plötur á ferli sínum og kom sú síðasta, Anti, út árið 2016. Það eru því þrjú ár síðan aðdáendur hennar fengu að heyra frá henni og margir farnir að ókyrrast.
Hún gat þó ekki lofað því að ný plata væri handan við hornið. „Hvað sem ég geri verður það sjálfsöruggt, sama hvort það verður plata, ilmvatn, nærföt, snyrtivörur eða tíska. Þið verðið bara öll að bíða. Navy, ég biðst afsökunar,“ sagði Rihanna í viðtali við People.
Rihanna hlaut sín fyrstu Grammy-verðlaun árið 2008 fyrir lagið Umbrella. Síðan þá hefur hún unnið til margra verðlauna, átta Grammy-verðlauna til viðbótar, BRIT-verðlauna og Billboard-verðlauna.
Rihanna hélt sitt árlega demantsball í fimmta skipti í gærkvöldi. Þar mætti hún í sínu fínasta pússi ásamt nokkrum þekktum nöfnum á borð við Cardi B, Offset, Karlie Kloss, Pharrel Williams, A$AP Rocky og forsætisráðherra Barbados-eyja Miu Mottley.