Bergir Ebbi Benediktsson gaf út bókina Skjáskot nú á dögunum. Hann segir bókina vera einskonar langa röksemd eða hugleiðingu um stöðu manneskjunnar gagnvart tækninni.
„Ég er að fjalla þarna um fjórðu iðnbyltinguna, gervigreind og hvernig tölvur gera fólk snjallt en ekki endilega sátt. En þó að umfjöllunarefnin séu alvarleg þá reyni ég að ná eins auðskiljanlegum vinkli á málin og mögulegt er, en vissulega er mikið myrkur í þessu,“ segir Bergur Ebbi.
Auk bókarinnar gaf hann út myndband til að myndskreyta bókina. Myndbandið, sem er skreytt áhrifamikilli tónlist Daða Birgissonar, er viljandi án tals og skýringa. „En það fjallar um þessa óskiljanlegu þrá manneskjunnar til að leita alltaf dýpra og koma sér í ástand paranoju og kvíða í þrá sinni eftir sannleika,“ segir Bergur.
Eina af niðurstöðum bókarinnar segir Bergur vera að sama hversu mjög fólk reyni að komast undan áhrifum skipulagðra trúarbragða og kredduhugsunar, þá virðist manneskjan alltaf stjórnast fyrst og fremst af forritun og táknum. „Það þarf ekkert endilega að vera neikvætt. Við erum fegurðarverur og við stjórnumst af hefðum, siðum og táknum. Ég reyni í bókinni að kafa aðeins dýpra í þetta og fer þarna í rannsókn á uppruna upplýsingatækninnar. Ég hef lengi verið áhugamaður um efni sem varða fyrstu tölvurnar og fyrstu stafrænu boðskiptin, en flestir frumkvöðlar þessarar tækni eru reyndar þegar horfnir af braut enda voru fyrstu skrefin stigin um miðja síðustu öld,“ segir Bergur.
Leikstjórn: Magnús Leifsson
Kvikmyndataka: Þór Elíasson
Klipping: Guðlaugur Andri Eyþórsson
Litavinnsla: Bjarki Guðjónsson/Trickshot
Aðstoðartökumaður: Guðjón Hrafn Guðmundsson og Haukur Karlsson
Ljós: Dagur Benedikt Reynisson
Tæki: KUKL
Tónlist og hljóðfæraleikur: Daði Birgisson
Hljóðblöndun: Daði Birgisson
Hljómjöfnun: Sigurdór Guðmundsson/Skonrokk Studios
Aðstoð við framleiðslu: Brynjar Björn Ingvarsson
Fram komu: Bergur Ebbi, Halldór Halldórsson, Ísak Hinriksson, Jakob Birgisson, Sólveig María Gunnarsdóttir, Þórunn Dís Hafberg Steinarsdóttir.