Þessu sjá þau eftir úr Friends

Marta Kauffman og David Crane skrifaðu handritið að Friends-þáttunum vinsælu. Í umræðum á Tribeca-sjónvarpshátíðinni á vegum Hollywood Reporter voru þau spurð hvort þau sæju eftir einhverju sem þau skrifuðu um vinina í New York. Kauffman nefndi tvo þætti sem hefðu mátt fara betur að hennar mati, sérstaklega hvað varðar Phoebe. 

Kauffman sagðist sjá eftir söguþræði þar sem Phoebe byrjar að hitta eltihrelli tvíburasystur sinnar. Eltihrellinn lék David Arquette og segir Kauffman þau hafa reynt að endurskrifa þáttinn oft. Handritshöfundurinn sagðist einnig sjá eftir þætti þar sem Phoebe og þáverandi ástmaður hennar sem Charlie Sheen lék fengu hlaupabólu þegar þau fóru í rómantíska helgarferð. 

Crane hins vegar mundi ekki eftir sérstökum senum og atriðum enda voru þáttaraðirnar tíu. Ef hann rekst á þátt segist hann stundum undrast skrifin og segir sumt efni vissulega betra en annað.

• Blogga um frétt