Tónlistarmaðurinn Robbie Williams ætlar ekki að láta verða af því að lúskra á tónlistarmanninum Liam Gallagher. Eiginkona Williams taldi hann af því og benti honum á að þeir væru báðir komnir af léttasta skeiði.
Williams og Gallagher hafa elt grátt silfur saman síðustu ár og skoraði Williams á hinn síðarnefnda í bardaga á Brit-verðlaununum árið 2000. Ekkert hefur orðið af bardaganum á síðustu 19 árum og nú er Williams hættur við áskorunina.
Um Brit-verðlaunahátíðina var skrifað á mbl.is 4. mars árið 2000: „Williams fékk verðlaun fyrir bestu smáskífuna og besta myndbandið en lagið var í báðum tilfellum She's The One. Þegar hann tók við verðlaununum manaði hann Gallagher, sem var í Japan á tónleikaferð, í slag og lagði 100 þúsund pund undir. Var Williams þarna að hefna sín á Gallagher sem lét svo um mælt fyrir skömmu að Williams væri bara „feitur dansari“.“
Williams og eiginkona hans Ayda Fields ræddu málið í nýja hlaðvarpsþættinum sínum „At Home With the Williamses“.
„Mér finnst það vandræðalegt. Þú ert 45 ára gamall. Ætlið þið inn í hring að lemja hvor annan? Það er bara glatað,“ sagði Fields við eiginmann sinn.
„Fyrir það fyrsta eruð þið hvorugur í ykkar besta formi. Þú ert ekki á þrítugsaldrinum, mér finnst leiðinlegt að segja þér það. Þið eruð báðir komnir til ára ykkar. Þið eigið eftir að fara í bakinu og meiða ykkur í hnjánum. Ég þarf að endurlífga þig eftir þetta. Ég skil þetta ekki,“ sagði Fields.
Hún bætti við að hún vildi bræða hatrið á milli þeirra og lagði til að þau myndu jafnvel senda Liam Gallagher jólakort þetta árið. Williams virðist hafa tekið vel í hugmynd eiginkonu sinnar.
„Þetta er hátíð ástar og friðar á milli allra manna, jafnvel Liams Gallaghers. Þökkum Guði fyrir að við höfum snúið þessu máli við,“ sagði Williams.