Mörg fyrrverandi hjón geta líklega ekki hugsað sér að vera saman í sóttkví, svo illa kemur þeim saman. Leikarahjónin fyrrverandi Bruce Willis og Demi Moore skildu fyrir 20 árum en eru nú saman í sjálfskipaðri sóttkví ásamt dætrum sínum.
Yngsta dóttir hjónanna fyrrverandi, Tallulah, birti mynd úr sóttkvínni á Instagram. Á myndinni má sjá fjölskylduna í samstæðum náttfötum. Hundurinn fékk meira að segja eins föt og mannfólkið.
Moore og Willis giftu sig árið 1987, eignuðust þrjár dætur og skildu árið 2000. Leikkonan er stolt af skilnaðinum og eru hjónin fyrrverandi mun betri vinir en mörg önnur fyrrverandi hjón. Willis er nú kvæntur Emmu Heming og á með henni tvær dætur. Willis og Heming endurnýjuðu heit sín í fyrra og var Moore á meðal gesta.