Vandræði hjá Fox og Green?

Hjónaband leikkonunnar Megan Fox og Brian Austin Green virðist á þunnum ís eftir að leikkonan sást með öðrum manni fyrir helgi.

Fox sást á rúntinum með rapparanum Machine Gun Kelly í Calabasas í Kaliforníu í Bandaríkjunum á föstudag. 

Fox og rapparinn eru bæði með hlutverk í Midnight in The Switchgrass, þótt framleiðsla á kvikmyndinni sé ekki hafin vegna kórónuveirunnar. 

Fox átti afmæli daginn eftir og þótti mörgum afmæliskveðja Green til eiginkonu sinnar gefa til kynna að vandamál væru í hjónabandinu. 

„Fiðrildin verða á endanum leið á því að sitja á blómi of lengi. Þeim finnst þau fá ekki nægt andrými. Það er stór heimur þarna úti og þau vilja upplifa hann,“ skrifaði Green í kveðju sinni til Fox.

Þetta er ekki í fyrsta skipti sem vandræði banka á dyrnar hjá Fox og Green. Þau kynntust fyrst árið 2004 og trúlofuðu sig árið 2006. Þau slitu trúlofuninni árið 2009 en trúlofuðu sig aftur skömmu seinna og gengu í það heilaga árið 2010.

Fox sótti svo um skilnað árið 2015 en ekkert varð þó úr skilnaðinum. Þau eiga þrjá syni saman, þá Journey River, Bodhi Ransom og Noah Shannon.

• Blogga um frétt